ស្ត្រីដែលត្រៀមសម្រាលកូនលើកដំបូងតែងតែមានអារម្មណ៍ភ័យខ្លាច
ជាពិសេសបារម្ភ បើពេលសម្រាលនោះគ្មានស្វាមីនៅក្បែរ ។
មិនខុសពីនារីទូទៅទេ អ្នកស្រីខាវ ថងញ៉ុត
ភរិយារបស់អធិរាជសំឡេងមាសស៊ីន ស៊ីសាមុត មានសភាពបែបនោះដែរ
មិនតែប៉ុណ្ណោះអ្នកស្រីខ្លាចពេលសម្រាលកូនហើយត្រូវដេកអាំងភ្លើង
ក្តៅខ្នង ។
ជំនួសរូបលោកដែលនៅឆ្ងាយពីភរិយាពេលសម្រាលកូនដំបូង លោកស៊ីន
ស៊ីសាមុត តែងនិងច្រៀងបទ «ឧត្តមដួងចិត្ត»
សម្រាប់បំពេភរិយាបំបាត់ការបារម្ភ និងឱ្យល្ហែល្ហើយចិត្ត ។
កំណើតកូនដំបូងឈ្មោះស៊ីន យុទ្ធនា របស់លោកស៊ីន ស៊ីសាមុត
ក៏ជាកំណើតបទ «ឧត្តមដួងចិត្ត» ដ៏ពេញនិយមដែរ ។
យោងតាមឯកសារ «ចម្រៀងចងក្រងឡើងវិញ»
ភាគ១ដែលរៀបរៀងដោយសមាគមស៊ីន ស៊ីសាមុត បញ្ជាក់ថា បទ
«ឧត្តមដួងចិត្ត» គឺជាបទដែលលោកស៊ីន ស៊ីសាមុត
តែងឱ្យភរិយាលោកគឺលោកស្រីខាវ ថងញ៉ុត
នាពេលកំណើតកូនស្រីដំបូងរបស់លោកឈ្មោះស៊ីន យុទ្ធនា
នាឆ្នាំ១៩៥៦ ។ មានឯកសារជាច្រើន
បានភ័ន្តច្រឡំចំពោះបទចម្រៀងនេះដោយបានភ្ជាប់អត្ថន័យបទនេះថា
ជាបទដែលលោកស៊ីន ស៊ីសាមុត
តែងឱ្យភរិយាពេលព្រាត់គ្នាក្រោយព្យុះស្នេហាត្រីកោណ ។
តែពុំមែនដូច្នោះឡើយ តាមការបញ្ជាក់ពីលោកស្រីខាវ ថងញ៉ុត
ឱ្យដឹងថា នៅពេលដែលលោកស្រីមានផ្ទៃពោះជិតគ្រប់ខែ
គាត់មានការបារម្ភយ៉ាងខ្លាំង
ដោយម្យ៉ាងត្រូវទៅសម្រាលកូននៅស្រុកឆ្ងាយពីប្តី
(ព្រោះពេលនោះពួកគាត់បានមកនៅជុំគ្នានៅភ្នំពេញ
ហើយគាត់ត្រូវទៅសម្រាលកូននៅស្ទឹងត្រែងវិញ) ។ ម្យ៉ាងទៀត
ខ្លាចពេលសម្រាលកូនហើយត្រូវដេកអាំងភ្លើងក្តៅខ្នង ។
ឮការបារម្ភពីភរិយាបែបនេះ លោកស៊ីន ស៊ីសាមុត បានសន្យាថា
«កុំព្រួយអី
ចាំគាត់តែងចម្រៀងមួយបទឱ្យស្តាប់ពេលអាំងភ្លើងកុំឱ្យក្តៅខ្នង» ។
ដូចការសន្យាមែន នាពេលឱ្យកំណើតកូនដំបូងនោះ
ចម្រៀងឧត្តមដួងចិត្តក៏បានឮតាមវិទ្យុជាតិមែន ។
បទនេះបានទទួលការពេញនិយមជាខ្លាំងពីមិត្តអ្នកស្តាប់គ្រប់មជ្ឈ
ដ្ឋាន ។ មិនត្រឹមតែក្នុងប្រទេសខ្មែរប៉ុណ្ណោះទេ
សូម្បីតែនៅប្រទេសថៃឯណោះក៏ល្បីល្បាញខ្លាំងណាស់ដែរ
ព្រោះការណ៍ពិតបទនេះយកតាមលំនាំបទអ្នកចម្រៀង សម យ៉ុត
ជាជនជាតិថៃ ។
បទចម្រៀង «ឧត្តមដួងចិត្ត»
រាយទំនុកថា:
១-ឧត្តមដួងចិត្តជីវិតបង
ឱ!ស្រស់នួនល្អងក្នុងដួងចិត្តបងសៅហ្មងរាល់ថ្ងៃ
តាំងពីស្រីពៅចាកទៅប្រុសនៅអាល័យ
ទន្ទឹងរាល់ពេលយប់ថ្ងៃថាស្រីថ្លៃមករកបង ។
២-ពេលគេងរៀមគេងឱបក្តីព្រួយ រូបមួយខ្លួនមួយព្រួយអើយសែន
ព្រួយៗពេកកន្លង ចរចាម្នាក់ឯងគ្មានឮសំឡេងឆ្លើយឆ្លង
ដួងចិត្តអាណិតបងផង ព្រោះតែបងនៅស្នេហា ។
បន្ទរ-វិលវិញណា៎ព្រលឹងអើយ ប្រុសយំទុក្ខធំឥតស្បើយ
ខ្នល់ខ្នើយកើយពីរកាយា ភួយយំរកនាងចង្កៀងសួររកជីវា៉
ម្ចាស់ខ្ញុំលោកទៅឋានណា ខ្ញុំសោកាខ្លោចផ្សាអាល័យ ។
៣-គួរណាស់វិលវិញកុំកែប្រែ វិលមករួមស្នេហ៍
ដៃបងទាំងទ្វេទទួលស្រីថ្លៃ វិលមកព្រលឹងបងគេងរំពឹងរាល់ថ្ងៃ
វិលមកចុះណា៎ចរណៃ បើស្រីថ្លៃមេត្តាបង។
តាមការផ្សាយរបស់សារព័ត៌មានក្នុងស្រុកមួយលេខ១៩២៦
ចេញផ្សាយថ្ងៃទី២៧ សីហា ឆ្នាំ១៩៩៩ បានឱ្យដឹងថា
តាមរយៈបទឧត្តមដួងចិត្ត លោកស៊ីន ស៊ីសាមុត
ទទួលបានការកោតសរសើរពីព្រះចៅរាជាណាចក្រថៃដោយសារលោកច្រៀង
បទនេះបានពីរោះជាងម្ចាស់ដើមទៅទៀត ។
ដូច្នេះហើយទើបនៅថ្ងៃទី១១ កញ្ញា ១៩៥៦
ក្នុងពិធីមហោស្រពនៅទីក្រុងបាងកក
សិល្បករថៃទូទាំងប្រទេសបានចូលរួមក្រោមព្រះរាជាធិបតីព្រះចៅ
ក្រុងសៀម ។ មុនចាប់ផ្តើមបើកមហោស្រពគេបានចាក់បទឧត្តមដួងចិត្ត
ដែលច្រៀងដោយលោកស៊ីន ស៊ីសាមុត
ទុកជានិមិត្តរូបនៃសំឡេងមាសជូនដល់សិល្បករថៃស្តាប់។
លុះចប់មហោស្រព
ព្រះចៅក្រុងសៀមបានធ្វើចុតហ្មាយមួយច្បាប់ជូនដល់លោកស៊ីន
ស៊ីសាមុត ក្នុងន័យសរសើរបំផុត
ព្រមទាំងភ្ជាប់នូវវត្ថុអនុស្សាវរីយ៍ជាសញ្ញាតូរ្យតន្ត្រីធ្វើ
អំពីមាសបារាំងមួយគ្រឿងដ៏វិសេសវិសាល ។
បើគិតទៅមកទល់នឹងពេលនេះបទ ឧត្តមដួងចិត្ត
មានអាយុប្រមាណជាងហាសិបឆ្នាំមក
ហើយៗនៅប្រទេសថៃបទចម្រៀងរបស់សម យ៉ុត
មានជនជាតិថៃតិចណាស់ដែលនៅស្គាល់ ប៉ុន្តែសម្រាប់ជនជាតិកម្ពុជា
ចម្រៀងរបស់លោកស៊ីន ស៊ីសាមុត នេះនៅតែស្តាប់ទៅពីរោះ
នៅតែរណ្តំពុំទាន់សាបសូន្យទៅណានៅឡើយ ។
និយាយរួមទៅមានខ្មែរច្រើនណាស់ដែលស្គាល់លោកស៊ីន ស៊ីសាមុត
លើកលែងតែអ្នកជំនាន់ក្រោយខ្លះយកចម្រៀងរបស់លោកទៅច្រៀងហើយបែរ
ជាមិនហ៊ាននិយាយពីឈ្មោះលោកស៊ីន ស៊ីសាមុត ទៅវិញទេ
មិនដឹងជាមានហេតុផលអ្វីទេ?
ខ្លាចអ្នកផងមើលទៅឃើញអន់ពេកក៏មិនដឹង?
អ្នករៀបរៀងបានទៅស្រាវជ្រាវបទនេះដល់ទីក្រុងបាងកក
ហើយរកបទនេះរបស់ថៃឈ្មោះសម យ៉ុត
ភាគច្រើនគេថាលែងមានលក់ហើយនៅតាមទីផ្សារធម្មតា
មានតែនៅបណ្ណាល័យ ធំៗ ។
អ្នករៀបរៀងប្រាប់ជនជាតិថៃវិញថា
«បើបទរបស់អ្នកចម្រៀងខ្មែរខ្ញុំវិញ
អ្នកឯងចង់ទៅរកនៅទីណាក៏មានដែរ ព្រោះគេនៅពេញនិយមនៅឡើយ» ។
សូមបញ្ជាក់ថា ចម្រៀងឧត្តមដួងចិត្តដែលអ្នករៀបរៀងដាក់ជូន
និងមាននៅលើទីផ្សារសព្វថ្ងៃនេះ ថតឡើងវិញនៅឆ្នាំ១៩៧០
ហើយសំរួលតន្ត្រីដោយលោក ម៊ែរ ប៊ុន អមនឹងសំឡេងវីយូឡុងរបស់
មិត្ត ស្រ៊ុន ដែលជាសិស្សសាលាភ្លេងជាមួយលោកវ៉ែន ផាត
ពិសេសបង្ហើរសំឡេងដោយលោកស៊ីន ស៊ីសាមុត
យ៉ាងពីរោះគ្មានពីរពុំទាន់សាបរលត់ទៅណាទេ ៕
Posted
October 11, 2013 by ouk bopha in
តារា
No comments:
Post a Comment