Kimchhorng: អ្នកស្រុកកំពង់ស្ពឺសម្រុកដាំស្វាយកែវរមៀតខណៈក្រុមហ៊ុនម៉ុងឫទ្ធីបង្កើតរោងចក្រវេចខ្ចប់ស្វាយ

Friday 01st November 2013

អ្នកស្រុកភ្នំស្រួច ខេត្តកំពង់ស្ពឺ បាននាំគ្នាសម្រុកដាំស្វាយកែវរមៀតយ៉ាងផុលផុស បន្ទាប់ បានទទួលព័ត៌មានថា ក្រុមហ៊ុនម៉ុងឫទ្ធីគ្រុបថ្មីៗនេះបានសម្រេចកិច្ចព្រមព្រៀងបឋមមួយ ជាមួយ ក្រុមហ៊ុនឃីង ហ្វ្រូត របស់សិង្ហបូរីក្នុងការចំណាយទុន វិនិយោគ២លានដុល្លារ សាងសង់រោងចក្រ វេចខ្ចប់ ស្វាយស្រស់ដំបូងគេបង្អស់នៅកម្ពុជា ដើម្បីនាំចេញដោយផ្ទាល់ទៅ ទីផ្សារក្រៅប្រទេស ។

លោក សយ បញ្ញា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺបានឲ្យដឹង ថា ការដាំដុះដំណាំស្វាយបានចាប់ផ្តើមកើនឡើងគួរឲ្យកត់សម្គាល់នៅអំឡុង ១០ឆ្នាំចុង ក្រោយ នេះ ពិសេសបន្ទាប់ពីពូជស្វាយកែវរមៀតទទួលបានការគាំទ្រច្រើនពីទីផ្សារ។ ជាមធ្យម ដំណាំ ស្វាយកែវរមៀតអាចផ្តើមទទួលផលបណ្តើរៗ បន្ទាប់ពីបានដាំដុះពីបីទៅបួនឆ្នាំរួចមក។

កសិករ តាមបណ្តាស្រុកនានានៃខេត្តកំពង់ស្ពឺ ពិសេសនៅស្រុកភ្នំស្រួចដែលភាគច្រើនមានផ្ទៃដីធំ ទូលាយ បច្ចុប្បន្នបានងាកចេញពីការដាំកសិផលផ្សេងៗ មកដាំស្វាយកែវរមៀតជំនួសវិញ ។

លោក បានឲ្យដឹងទៀតថា រហូតមកដល់ពេលនេះផ្លែស្វាយដែលអ្នកស្រុកដាំបានអាច លក់ចេញបានតែទៅប្រទេសវៀតណាម និងថៃ ដែលចុងបញ្ចប់ត្រូវបានលក់បន្តទៅប្រទេសចិន។

ការដែលមិនអាចនាំចេញដោយផ្ទាល់ទៅទីផ្សារប្រើប្រាស់ចុងក្រោយនេះ គឺមានការខាតបង់ប្រាក់ ជាច្រើនទៅឈ្មួញកណ្តាល ហើយនេះដោយសារអសមត្ថភាពក្នុងការបំពេញតាមស្តង់ដារ ការ គ្រប់គ្រងអនាម័យដែលមិនសមស្របតាមលក្ខខណ្ឌតម្រូវពីខាងទីផ្សារបរទេស ។ អ្នកស្រុកខេត្ត កំពង់ស្ពឺបានសម្តែងការសប្បាយរីករាយ ដែលមានរោងចក្រនាំចេញស្វាយនៅកម្ពុជា ព្រោះវា នឹងរួមចំណែកបង្កើនការនាំចេញដោយផ្ទាល់ទៅទីផ្សារ និងបង្កើនតម្លៃដល់ផលិតផលរបស់ប្រជា កសិករ ។

តំណាងក្រុមហ៊ុនម៉ុងឫទ្ធីមួយរូបបានឲ្យដឹងថា រោងចក្រថ្មីសម្រាប់នាំចេញ ស្វាយ គ្រោងចាប់ផ្តើមដំណើរការជាផ្លូវការនៅចុងឆ្នាំ២០១៤ ដែលបច្ចុប្បន្នអ្នកជំនាញផ្នែកបច្ចេក ទេស កំពុងសិក្សាសាងសង់រោងចក្រ ដែលមានផ្ទៃដី១២ហិកតា ស្ថិតនៅភូមិកែវផុស ឃុំកែវផុស ស្រុកស្ទឹងហាវ ខេត្តព្រះសីហនុ ។ តំណាងរូបនោះបានបន្តឲ្យដឹងទៀតថា កន្លងមកផ្លែស្វាយពី កម្ពុជាមិនអាចនាំចេញដោយផ្ទាល់ ទៅទីផ្សារអន្តរជាតិទេ ដោយសារមិនអាចបំពេញបានតាម លក្ខខណ្ឌតម្រូវការទីផ្សារ ។

ដូចនេះការបង្កើតឲ្យមានរោងចក្រសម្រាប់បញ្ជាក់ពីគុណភាពវេចខ្ចប់ នឹងធ្វើឲ្យផលិតផលរបស់ កសិករអាចចូលទៅទីផ្សារបរទេសបាន។ រោងចក្រថ្មីនេះ នឹងអនុវត្ត បច្ចេកទេសសម្លាប់មេរោគ អនុវត្តរបៀបរក្សាទុកក្រោយពេលប្រមូលផលតាមលក្ខខណ្ឌ ទីផ្សារ និងការបញ្ជាក់ពីសុវត្ថិភាពផ្លែស្វាយ ដើម្បីអោយអ្នកបញ្ជាទិញមានទំនុកចិត្ត ។ ក្រុមហ៊ុន មានគោលដៅក្នុងការនាំចេញដំបូងទៅសិង្ហបូរី ជប៉ុន និង កូរ៉េ ។ វត្តមានរោងចក្រនេះនឹងរួម ចំណែក បង្កើនតម្លៃស្វាយ ពិសេសបង្កើនចំណូលរបស់កសិករ ៕

អ្នកស្រុកកំពង់ស្ពឺសម្រុកដាំស្វាយកែវរមៀតខណៈក្រុមហ៊ុនម៉ុងឫទ្ធីបង្កើតរោងចក្រវេចខ្ចប់ស្វាយ